نفسنــــة البنــات المنفسنـــــة النفســاوية

فى البداية احب أنوه إنى هتكلم على فئة تمثل جزء من البنات

فما هن إلا (جزء من أو بعض البنات مش كلهم يعنى)

ندخل فى الموضوع

ليه بعض أو جزء كبير من البنات منفسنة وعندهم نفسية من بعض كده؟؟

ومنفسنة بدرجة جيد جداً كمان

كنت بسمع الموضوع دى زمان وأنا صغيرة شوية بس مكنتش بنتبهله أو مش بديه إهتمام كبير

وده تيقناً منى أنه شىء غير وارد أو شىء غير موجود

انما لما كبرت شوية اكتفشت فعلاً اننا كبنات فى مننا كتير منفسنين

منفسنين تعنى : أن نفسيتهم تجاه البنات الى زيهم مش آد كده

وده بيتمثل فى مواقف كتير هسرد بعضها..

وأنتوا كمان تحكوا لو حصلتلكوا مواقف شخصية تخص الموضوع ده

تلاقى مثلا شلة بنات خارجة وفيهم واحدة وشها منور ومزنهر كده ولطيفة ورقيقة والبنت حلوة

يعنى

تلاقى بقية الشلة المتكونة من البنات (محور كلامنا)

تقولك لا..مش حلوة

طيب شفتى مشيتها يااى خالص

ولا ولا طريقة كلامها لوكل جدا..

ولا إسلوبها والمستوى اوووووهه ..دون المستوى

وقال يعنى عينيهم وقعت على العيوب بس وكأنها مسلطة سبحان الله

ولما وقعت و جت على الميزات قالت:

"حاش وكلا ومات وفلا"

وتلاحظى كده فى طريقة كلامهم عن البنت دى

نوع من القرفة و الاشمئزاز الشنيع المريع

متقولش واقفين جنب وحدة صرف صحى مثلاً

وده طبعا بيكون امتثالاً لقول ..

"ملقوش فى الورد عيب قالوا يا احمر الخدين"

ده نوع من النفسنة المتفشى بين البنت والبنت

--------

نوع تانى بنلاقية لما يجى لبنت عريس مثلا

وصاحبتها الانتيخ لسة عدلها موصلش من رحلته الفضائية

.ويا سلام لو عرفت معاد العريس الى جاى فيه لأنتيختها

تلاقى ستالايت وأقمار صناعية شغالة بتحوم وتحوم

لحد ما تبلغ الوقت..وتحدد الهدف وتتمكن منه

بعد ذلك يتم التحقق من نوعية العريس وتعاين البضاعة كويس

ده كله طبعاً بيكون مصاحبه حالة من التركيز الشديد

ومعاينة فائقة الجودةفى جميع الانحاء ومن كل النواحى..

متقليش مثلا كائن فضائى ارجوازى برجوازى غريب

او مرة تسمع عنه..

فبتتحقق منها

على فكرة ده حصل لناس كتير

ده كله لأن طبعا لما يجلها عدلها ان شاء الله تتم المقارنة السليمة المبنية على القواعد الأساسية

وأهو حتى من باب "العلم بالشىء"

---------------

بواصل معاكم فى حالات النفسنة المتعددة الأشكال والأطوار ومكملين

----------

ولا بقى لما تكونى فى مكان عام

يوووووووه

كله كله كوم ...وده كوم تانى خالص مالص

لما مثلاً بيكون فى بنت مثلا فى التويلت بتظبط الميك أبـ بتاعها

تلاقيها مشألطة العلبة

وقالبة الماركة من ناحيتها

وكأن العلبة مفروض عليها حظر النشر مثلاً

مش عارفين!!

-------------

النفسنة مستمرة والحركات القرعة الى بتكون بين بعض البنات شغالة ويتزداد قرعاً

..لحد ما الرأس هتقرب تنقرض من كتر القرع والصلع الى بيحصلها

مااااااا علينا

من ضمن الحركات بردو

إنك تلاقى بنوتة مثلاً حاطة كريم حلو أوى

ومنور كده وباين عليه أن حاجة نضيفة وماركة كويسة

تيجى تسأليها على الماركة أو النوع تقولك:

اسكتى يا اخوتشى..مش ده طبيعى..!

ما يخطر ببالك ويستحوز على فكر حضرتك فى نفس ذات اللحظة

هو إنك تصمتى برهة

وتقومى متكلمة وقايلة:

"آآه شوف ازاى ..تاهت عنى دى"

ولا اما تكون فى فرح مثلا وتلاقى بنتين لابسين نفس الطقم أو نفس الفستان

حالة من الغضب والانهيار العصبى

والإلتواء الحاد فى الرقبة الناتج عن حالة عصبية فكرية نفسية جسدية فزلكاوية خطيرة

لكل من البنتين

متقولش مثلا جمعتهم الاتنين فى اوضة مقفولة وسلطت عليهم صرصار طاير مثلاً

------------

وما الى ذلك من نفسنة منتظرة ومتفحشة بين بعض البنات

زى التصوير البطىء مثلاً لأى طقم جديد لصاحبة ما فى الشلة..

وكأنها أول مرة تشوف لبس

علشان طبعا يتم تقليد الطقم تقليدا تاماً مستقبلاً إن شاء الله

وبيصاحب النفسنة المتفحشة فى المجتمع موجة من التقليد الاعمى الى كتييييير أوى من

البنات بيتبعوه

ودى الى بتسبب فى ظهور التقاليع الجديدة الى بتظهر وبتتفشى اكتر يوم عن اليوم

ربنا يهدي البنات ويرزقهم أزواج صالحين بإذن الله

بس قبل كده ياريت كل بنت وأنا بما فيهم

ياريت كلنا نسأل نفسنا السؤال ده :

دايما بندعى وبنتمنى أن ربنا يرزقنا أزواج صالحين

بس عمرنا ما سألنا نفسنا..,

هل فعلا كل واحدة مننا نستاهل بجد زوج صالح؟؟

-------------

دى كانت بعض المواقف من النفسنة

منتظرة مواقفكم الى اتعرضتوا ليها أو شفتوها من قبل