اصرخي يا ام الشهيد

اصرخي يا أم الشهيد

ابكي ونوحي عليه

دم إبنك راح هدر

وإل مات إبنك عشانه

أنا مش لاقيه

والكلاب من دمه شربت

والضباع رقصت عليه

والذئاب علي قبره وقفت

قاعدة تنهش فيه وليه

كله دور ع المناصب

كله زاحم ع الكراسي

والفران خرجت تزئطت

يعلا صوتها وكله ناسي

بعد عيشة البلاعات

خرجوا من توب السكات

كله سانن في المخالب

إل ناصب وإل ناهب

يلا نكبش أي كبشه

يلا نهبش أي هبشه

ما البلد زاطت وهايصه

والخسيس عامل شريف

جي لابس توب نضيف

في إيده سبحه وقام يصلي

ناسي لما كان مدلي

رقبته ديا يا خلق للي

كان حاكمنا وكان مخلي

كل حاجه في الهبولي

اصرخي يا أم الشهيد

الطمي بقا ع الخدود

بعد ما قلنا الفجر جي

عشنا في ظلمه بدون حدود

بعد ما كنا اتحدنا

ساد علينا الإختلاف

كله أنن قال يا نفسي

تغور في داهيه باقي الناس

اه يا أمي م ال جاري وال حاصل

لسا ذيل البرص يلعب

بعد ما الناس قطعوا راسه

لسا ذيل الخسه بينا

لسا ماسك في الكراسي

لسا عايش في عقولنا

لسا جوا الدم ماشي

والمذيع الحر فلسع

قالك ألحق روحي وأخلع

قبل ما تبان المصايب

قبل ما تبان الفضايح

والحرامي عامل محامي

ولحقوقنا جي حامي

سن قلمه وقام يحامي

توب محامي بروح حرامي

اصرخي يا أم الشهيد

فهمي الطفل الوليد

يبني بلده من جديد

ينسا كله قديم جديد

يفتكر حق الشهيد

ال ضحا بدمه كله

ال ساب أهله وأمه

ال عاش كان كل همه

يحمي بلده يفرح أمه

ال مات وسط الحروب

وال مات صارخ وثاير

وال مات كان دمه فاير

وال مات علي بلده غاير

علميه ازاي يبقا ثاير

مهما أقول أنا أو أعيد

ما أوفي يوم حق الشهيد

اصرخي يا أم الشهيد

اصرخي يا أم الشهيد

فهمي الطفل الوليد

يبني بلده من جديد

ينسا كله قديم جديد

يفتكر حق الشهيد

ال ضحا بدمه كله

ال ساب أهله وأمه

ال عاش كان كل همه

يحمي بلده يفرح أمه

ــــــــــــــــــــــــــــــــــــ

إن شاء الله ربنا يسخر لمصر من أهلها من يحميها و يحمي

أبناءها و يعيد لها أمجادها و دورها العظيم فيما يرضي الله.

شكرا لك على الطرح القيم لو كان من حقي التقييم لما بخلت

عليك به.

تقبل مروري أخي حسام

مرورك بيشرفني وبيسعدني دايما يا ورده وفي انتظار كل جديد منك

وشكرا لمرورك وردودك ال بتسعدني دايما وتقبلي تحياتي

طب اقولك ايه ؟؟
بجد تحفة
جااااااااامدة جدااااااا
اثرت فيا اووي
بجد يا حسرة قلب ام الشهيد

مرسي منورا منوره واسف لتاخيري في الرد علي مرورك الكريم بس غصب عني الجيش بقا هو

ال باعدني عن المنتدي والناس الحلوه ال فيه