بحب السمك ( بسرية )

بسرية

ياعم يا صياد مالك حزين كده ليه

قالي رميت الشبك وطلعلي فاضي يا بيه

قلتله طب والسمك فينه وفين أراضيه

قال والله ما انا عارف إيه شغله عني إيه

إختفا السمك كده ليه

وأنا بتكلم معاه طلعتله بلطيه

جياله برساله

قالتله السمك ثاير وشوف بقي حالك أصله خلاص قرر لازم هيتحرر

ولا عمره يسيب حقه ولا أكله هيتكرر

رد ثاير ليه

في إيه عندكم حصل إيه

هي الشوطه إل في بلادنا جت عندكم ولا إيه

ردت وبصوت حزين النبره منه هم الظلم زاد وإنتشر

وعيشتنا هم في غم

والحوت طغا وإتجبر لحد فاق الحد

وزاد كده في ظلمه ولا عاد يهمه حد

وقال للإخطبوط إعملي جيش مظبوط

في كتيبه من القروش للرحمه ميعرفوش

وإعملي من الثعابين فرقه بصاصين

يلفوا كل البحور

في كافيه كان أو طابور

في الجامعه وفي المدارس

في الأتوبيس ليا حارس

في الشارع ع الشطوط في السيما يا إخطبوط

عايزهم في كل مكان ما في موجه تتحرك غير لما أخد بيها تمام

وأي صوت يطلع

يتخرس كده في الحال

وإسمع يا إخطبوط ونفذ كلامي مظبوط

عايز سمك البحور يجي هنا عندي

يركع يبوس رجلي

رد الإخطبوط ده إل كل بيحبوك

لو سمعت بيقوله إيه في ذكرك

هتقول دول يعشقوك

طلعت بسرياية معرفش جاتله منين

قالتله فوق يا حوت واخدنا ورايح علي فين

البحر ليه قوانين معروفه ومن سنين

ربك مشرعها وعشنا بيها سنين

طول عمرنا وإحنا بيها في أمان عايشين

رد عليها الحوت

إزاي تواجهيني هو إنتي مش شايفه شوفي نفسك وبصيلي

أنا إيه وإنتي إيه

ده إنتي بسرياية لكن أنا أنا حوت شوفي حجمي بقا مظبوط

بس الغريب في الأمر

كانت جريئه موت

قالت له غمض عينيك لو كنت جريء ياحوت

إستعجب كده لقولها وغمض بدون تفكير

مهو بيها مستهزء أصله مهاب وخطير

راحت رزعاه قلم وده شيء بجد خطير

الحوت ده جاله ذهول

بقا ده حصل معقول

تضربني بسريايه علي وشي وقفايا

الحوت أصابه ذهول أنا أنضرب معقول

وفضل يا كلم نفسه ياويلك يا سواد ليلك راح أجعلك عبره لإخواتك وللسمك غيرك

بس البسرياية سبحت بسرعه تفوق الصوت

مهربتش عشان جبانه لا ده كان مخطوط

قالت أجهز وأرجعله ويكون معايا جيش إذا كان معاه القرش ومعاه الإخطبوط

فانا معايا الحق وعمري ما هبت الموت

في معديه سرب تونه سألها إيه مالك

لونك ليه إتخطف يا بسرية إيه جرالك

قالتلهم أصل الحوت طغا أوي إتجبر

رحت وضربته قلم ومكنش يتصور

إن الإهانه تجيه من سمكه غلابنه حته بسريه بسيطه وإتجنن اهيين يانا

ضحكت أوي التونه وانتشر الخبر في الحال

واتجمع السلمون مع السبيط يا سلام وجت المكرونه وهي فرحانه

الله عليكي يا بسرية يا رافعه رسنا ومشرفانه

لولولولولولولولولولوي

والجمبري والكبوريا راحو للإستاكوزا

يتصلوا بالبلطي والروسي وبموسي وجمعوا السبيط وجه كده بيزيط

وكان فرحان أوي بيقول يا حوت يا عبيط ضربتك بسرية قلم وإنت علينا سليط

وجالهم البربوني

خدوني كده معاكم أحميكو وأرعاكم وأكون أنا صوتكم وأبقا أنا قائدكم

ردت عليه البسرية

طب وإنت كنت فين

لما إتظلمنا سنين

لما كده إتهنا وكلونا بالملايين

لا إنسا يا معلم ده مفيش فينا قواد

ده كلنا إيد واحده ومفيش ما بينا زعيم وهدفنا هدف واحد

هدفنا هو الخير

عايزين نعيش أحرار من غير حديد أو نار

عايزين نعيش في أمان

مش نسيب ظالم ويحكمنا كده وصولي

إمشي وخد حزبك يلا إخفو وسيبوني

لكن البربوني فضل وفضل معاه حزبه

هدفه كده كام شط واهي تبقي سبوبه

يكسب ويسترزق ما الطرابيزه مقلوبه

وع الجه التانيه

الحوت كده ثاير

صرخ بعلو الصوت هاتولي الإخطبوط إجمعلي كل الجيوش

وتجبلي البسرياية عايزها في غمضه عين تكون هنا معايه

أذوقها مرار الذل وأفعصها كده بإيدي

الإخطبوط عاجز ساكت مش لاقي رد

سأله الحوت إيه مالك برده معندوش رد

صرخ بغضب الحوت في إيه ليه السكوت ما ترد يا إخطبوط

وإشتري حياتك لهقتلك في الحال

قولي إيه السر

إيه السر في سكاتك

رد بصوت مبحوح البسرية عملت جيش وجمعت الكبوريا والبوري والسبيط

وبعتت كده مراسيل في كل البحور يا عظيم

وقامو إيد واحده في ثوره مالها مثيل

وكلهم إيد واحده بهدف واحد يا كبير

بيطالبو بإيه ياطور

بيطالبو بالتغير

بيطالبوا بالحريه ونفسهم في الخير

عايزين يكونوا أحرار

وده شيء بجد خطير

قعد الحوت وإتكسر وتشور عليا بإيه

دخل عليهم القرش بغطرسه

مالكم كده في إيه

مالك يا ريسنا مهموم أوي كده ليه

رد عليه البسريه طلعت مع الأسماك وإجتمعو إيد واحده وعملو ثوره هناك

رد القرش بغطرسه عادي وإيه يعني

ودي يعني أول مره ما ياما حصلت كثير

إديني بس ساعه وههشهم يا كبير

وهز زعنفته وسن في سنانه وقال لرجالته

يلا يا رجاله

وإنطلقوا ع الثوار كما الطور الهايج

وعملوعليهم حصار

وبدأو ضرب النار

لكن البسريه وقفت في وشه كده وضحكت

قالته إل يموت فينا

هيقوم ألوف غيره

وهيجيبه كده حقه

ولا ينكرو خيره

وإل هيسقط شهيد

في الجنه مكانه أكيد

وفضلوا علي ده الحال

يوم بعد يوم يا خال

لحد ما جه في يوم القرش فيه إختفا مع كل رجالته

طب هرب ده ولا إتنفا ما عرفنا إيه حالته

ونزل جانب م الجيش قلبه كده معاهم

وقف ما مس حد ده جي يرعاهم

بس الشيء الغريب القرش الأبيض هرب

خرج كده م السجون يروع الغلبان ويأكل المظلوم

إتجمع الكفيار ووقف عمل لجنه وإنضمت ليه السلحفه ونظموا اللجنه

عملوا نبطشيات تفتيش كده وحرسات

حموا كده بيوتهم ودافعوا عن قوتهم لا خافوا بطش القرش

ولا خافو كده من الموت وقفو إيد وحده إتحدوا وعلو الصوت

وقفو ما هابو الموت

قالو بعلو الصوت إيه يعني لما نموت ما في شهداء إخونا

ماتو كده عشانا وسكنو في الجنه

وفدونا بدماهم وده دين في رقبتنا لحد يوم الدين

الدم ما يروح هدر مهما عشنا سنين

وإشتعلت الثوره وطالت كل البحور

وظالم ورا ظالم وقع كده مكسور

والحق عاد لأصحابه بفضل البسرياية

مهي واجهت يا ناس الحوت وما هابت في يوم الموت

وراح خلاص الحوت

ومسكو الإخطبوط والقرش المتغطرس ما طلعله والله صوت

ما راح زمن السكوت

شوفتو البسرياية أجمل بسرياية

عملت إل ما عمله البربوني يا رجاله

وأهي عبره لكل الكون دوله الظلم وان طالت مسيرها تنهار يوم

عشتلنا يا بسريه وعشتوا يا أسماك

وقفتو إيد وحده الله عليكوا يا ولاد

بس المشوار طويل لسا بقي التجميل

نبني ونعمر

ننمي ونخضر نصنع ونصدر

ونبقي أحسن قوم

وهفضل كده أحلم وقت أما يجي اليوم تتحد كل البحور وتبقي إيد واحده

ده كلنا أخوه تجمعنا مياه واحده

ودمنا واحد وأصلنا واحد

وربنا واحد

الله

هو الواحد

عشتلنا يا بسرية وعشتو يا أسماك رفعته رأس البحر من تاني كده يا ولاد

عشتلنا يا بسرية

وعشتو يا أسماك