إلى كل أخوتى وأخواتى أعضاء المنتدى ..

إلى اخوتى وأخواتى الذين أعتز بهم بالمنتدى ..

أحبكم كلكم فى الله .. أقولها وبلا تملق .. هذا احساسى تجاهكم .. ولست على استعداد أن أختلف فى المنتدى مع من يخالفنى الرأى .. أيا كان من أختلف معه .. وأياً كان رأيه .. سأحتفظ برأيى داخل صدرى .. وليقل كل من شاء رأيه .. لكنى سأكتفى بالمشاهدة من بعيد .. لن أنقطع لحظة عن المنتدى .. لن أشارك فى أى موضوعات أو أبدى رأيى مهما كان .. حتى ينتقل الإختلاف فى الرأىفيما بيننا إلى ساحة نتبادل فيها التشكيك فى أنفسنا ..

وحفاظا على مايربطنى بكل الأخوة والأخوات من تقدير واحترام ..الكل بلا استثناء .. ابتداءاً من فريد ( ساد بوى ) الأصغر سناً ومن يكبره أياً كان اسمه وسنه .. حتى لا يتم التشكيك فى وطنيتى أو مصريتى .. التى لا أزايد عليها .. كلنا وبلا استثناء ـ اتفقنا أو اختلفنا ـ نحمل نفس القدر من حب مصر .. كلنا وبلا استثناء ـ اتفقنا أو اختلفنا ـ طالعين من طين مصر .. كلنا وبلا استثناء ـ اتفقنا أو اختلفنا ـ لحم كتافنا من خير مصر حتى لو كان هذا الخير طبق فول مدمس أو حتة جبنة قديمة .. كلنا وبلا استثناء ـ اتفقنا أو اختلفنا ـ اكتوينا بنار الوقوف فى طوابير العيش ..والزحام على الجمعيات الاستهلاكية عشان كيلو سكر ولاّ كيلو رز .. كلنا وبلا استثناء ـ اتفقنا أو اختلفنا ـ عانينا من نار البحث عن انبوبة بوتاجاز ساعة الأزمة .. أو انقطاع الكهربا فى عز الحر وفى عز ليالى رمضان .. كلنا وبلا استثناء ـ اتفقنا أو اختلفنا ـ رأينا من يسكن المقابر .. ورأينا من يبحث عن اللقمة داخل صناديق الزبالة .. وزحمة المواصلات.. والغلاء .. والبطالة .. والمحسوبية ..والظلم .. والفساد.. والبلطجة .. والتزوير .. وبلاوى كتيرة عشناها وعانينا منها كلنا أو أغلبنا وأنا واحد منهم .. وكل دى خطايا النظام .. ليس النظام الحالى وحده ولكن من سبقوه ساهموا أيضا بقدر فى هذه المعاناة ..

لكن ده معناه أنى اساهم فى زيادة المعاناة باللى بتحصل والمطلوب منى أوافق عليها .. آسف .. آسف
أنا زى أى مواطن بانزل كل يوم اقف فى طابور العيش .. واجيب احتياجات بيتى بغلاء أكتر من الغلاء اللى كنت أعانى منه قبل 25 يناير وياريت ألاقى كل احتياجاتى .. وأنزل بالليل مع شباب فى سن أولادى ومعايا شومة ولا ساطور عشان أوفر الأمن لأهل بيتى .. وأصبحت أشك فى أى حد حوالىّ .. مش عارف مين معايا ومين علىّ .. لو خرجت لأى مكان برة الشارع بتاعى بيتم تفتيش شنطتى عشان أكمل مشوارى .. عملت حظر جوة بيتى على بنتى عشان ماتنزلش الشارع فى الظروف الزفت دى .. والمطلوب منى لما الريس يوافق على مطالب الشباب دى عشان يرجعوا بيوتهم والعجلة تمشى .. مفروض أقول لأ لازم تمشى دلوقتى .. أقول لأ على تنازلات مقدرتش أنا ولا كل اللى فى سنى أحصل عليها فى 25 سنة والشباب حصلوا عليها فى أسبوع .. أنا أعرف إن مالا يدرك كله لايترك كله .. ده أهم حاجة كسبتها انى خلصت من زبانية النظام .. العادلى وصفوت وبطرس غالى وغيرهم فى خبطة واحدة .. المفروض نرجع بيوتنا وأى مطالب تانية شبابنا الله يحميهم موجودين وميدان التحرير مش هاينقلوه ..!!!

ياجماعة حالنا واقف .. ومصر بتضيع .. بتتخرب .. بتتسرق .. بتتحرق .. والنار طايلانا كلنا فيه ناس أرزقية بيشتغلوا باليوم يعنى رزق يوم بيوم وحسب مايرزقهم ربنا مش لاقيين اللقمة ياكلوها .. وأنا باعذرهم لما يطلعوا يكسروا سوبر ماركت ولا محل بقالة عشان ياكلوا .. ولا يهاجمونى فى بيتى وفى شقتى عشان يسرقونى .. فيه موظفين لغاية النهاردة ما صرفوش مرتباتهم اللى بتكفيهم ذل السؤال مفيش معاهم أى فلوس ومش قادرين يروحوا أشغالهم .. مش كلنا ظروفنا مرتاحة والدولاب بتاعه مرمى فيه كام باكو ولاّ كام رزمة لزوم المعيشة ..

وبعد ده كله أقول لأ حسنى مبارك لازم يمشى .. ودلوقتى .. فيه ألف كلب سعران مستنى اللحظة دى عشان يبتدى ينهش عشان الكرسى .. مين البرادعى ومين أيمن نور .. ومين هم الكتلة الوطنية ـ شوفوا المغالطة ـ كتلة وطنية .. اللى كانوا زى الفيران فى الجحور وطلوا براسهم بعد 25 يناير عشان يسرقوا جدعنة وشهامة شبابنا .. وينطوا على كتافهم عشان يبقى لهم نصيب فى التورتة .. أقسم بالله إن لو فيه قدر من الفهم والوعى كان لابد من إشراك بعض من الشباب دى فى الحكم .. ونشوف رؤيتهم ونحترمهم .. بس يرجعوا بيوتهم ,, وحسنى ماشى ماشى .. بس يمشى باحترام .. مهما كان حسنى مبارك فهو رمز .. هو لغاية دلوقتى كبيرى اللى لازم أوقره لغاية ماتعدى المدة القصيرة اللى جاية .. مش دى برضه الأصول اللى اتربينا عليها فى بيوتنا احترام الكبير ..

وعشان كل هذا وغيره .. لن أختلف مع أى رأى حتى لا نتعارك ونجعل منتدى رامى ميدان تحرير آخر نتراشق فيه بالألفاظ والإهانات بدلاً من الحجارة.. وإذا كنت باحب منتدى رامى وده أكيد .. فأنا باحب مصر أكتر وده أيضاً أكيد وبلا مزايدة ..

على فكرة أنا طول النهار باتفرج على قنوات الجزيرة والجزيرة مباشر والعربية والحوار والفراعين وأيضا BBC و CNN .. وكذلك القنوات المصرية ( ماهو أنا معاشات بقى وفاضى ) ولم يحدث لى غسيل مخ أو إقناع بالعافية

سامحونى اخوتى للإطالة .. وشكراً للجميع ..

Admin عدد الرسائل : 8186 تاريخ التسجيل : 04/11/2008

الاختلاف في الرأي لايفسد للود قضيه يا منعم ابدآ

خليك معانا دايمآ وياريت متغيبش والاختلاف في الراي امر طبيعي وديمقراطي

مش هيا دي الديمقراطيه اللي احنا بندور عليها ؟ يبقي لازم نتقبلها من الآن

تسلم عمو منعم انت قولت كل اللى بحاول اقوله من امبارح

بس للاسف تعرضت للهجوم والاتهامات التى ارفضها كلية

ولن اتحمل وزر الرد عليها ربنا شاهد على اللى حصل

وانا اعلنت امس انى منسحبة من المشاركة باى موضوعات

او الرد على اى موضوع بالمنتدى او المشاركة بالشات حتى

انتهاء انتخابات الرئاسة الجديدة عندها ستكون كل النفوس قد هدات

ورجعنا الى حياتنا العادية احترم وجهة النظر الاخرى ولى كل الحق

فى الدفاع عن وجهة نظرى كما هو مشروع للراى الاخر

حتى لا اخسر اى احد من الشخصيات الجميلة التى تعرفت

عليها بالمنتدى وكلهم اخواتى واصحابى ولكن هذا هو انسب حل

فى الوقت الحاضر فى الاخر كلنا بنحب المنتدى ولا اريد ان

ينحول الى صورة مما يجرى فى ميدان التحرير

واتقدم بكل الشكر الى مدير المنتدى المحترم رامى

احنا بنحبك وبنحب المنتدى واجبرتنا على احترامك دائما

انا اتفق معاك يا عمو عبد المنعم بس لو قكرت مش هتلقى حل

تانى بعد الفتنه اللى حصلت دى غير انهو يرحل ومش يرحل علشان فى ناس مش عوزه لا

يرحل لوقف الدماء يرحل من اجل الناس اللى بتموت كل ثانيه يرحل علشان خاطر مصر فى

حد فكر بكره ممكن يحصل ايه لو ما ممشاش انا بيتهيئلى ان بكره هيبقا يوم دمار مصر

بايدى المصرين

قد اكون اتفق معك فى بعض الاراء وقد اكون اختلاف فى بعضها يا عمو منعم

بس زىما قال رامى الاختلاف لا يفسدللود قضية كل واحد من حقه يقول رايه

ويعبر عن راى بحرية بس انا وجهة نظرى اللى نفسى الكل يفهمها وينغذها

اننا وصلنا لمنطقة حرجة جدا وهى مش اننا مختلفين على حسنى اوغيرواومؤيدين

اومعارضين لا لكننا بنتكلم فىاستقرار وامن البلد اللى ممكن يوصلنا لمنطقة خطر

جدا وزىما قال عمو منعم حسنى ما هوماشى ماشى بس حالتنا دلوقتى متسمحش

باننا نختلف مع بعض كتير فوقو بقى قبل ما نلاقى اسرائيل دخلة علينا ولا جهات

خارجية عاوزة تنهش فينا يا جماعةاستحملوالكام شهر دول الراجل عمل اللى عليه

ادوه فرصة يا جماعة مش حنخسر بالعكس احنا كدة اللى حنخسر وبنخسر الكام يوم

اللى حصل فيهمالمظاهراتشوفو خسرنا اد ايه فى البورصة والناس اللى محلاتها اتكسرت ذنبها ايه

ولما واحدمنناس الغلابة دلوقتى مش عارفة ينزل يشتغل الشغلانة الحرة اللى بياكل منها عيش

وبيكسب منها باليومية فكروفى كل دة واستحملوعشانهم شوية الناس دى مش عارفة تجيب احتياجاتها

اليومية وايه ذنبهم يتحملونتيجة عند الناس اللى بتتظاهر يمكن لهم اهل بتصرف عليهم لكن الناس دى

مسؤلة على اطفال واسرة ومحتاجين حاجات عشان يعيشو واللى احنا فيه دة اسمه وقف حال

كدة بتوقفو الحياة ومحدش حيعرف يعيش ابوس ايدكم استحملو الكام شهر

مش حقول انا بؤيد ولا بعارض حقول انا عاوزةاستقرار وامن البلد يرجع

وزى ما قال عمو الميدان اهوموجودوالشباب موجودين لو رشح نفسه تانى

ابقو اتظاهرو تانى بس مظاهرات تانى لا كفاية وكفاية ان فى ناس بتصطاد فى المية العكرة

محدش يديهم فرصة افهمونى بالله عليكم وخدو فى اعتباركم الناس اللى حياتها وقفة بسبب

كل اللى حاصل دة

عمو انت عندك حق فى كل كلامك وانا عيز اقولك حاجه يا رامى فعلا كل واحد ححر فى رائو

بس بردك لازم يكون فى احترام للاخر شكرا لكل من اتهمنا باخيانه

اولا اشكر لراس الحكمه بالمنتدي الغالي الاستاذ الفاضل منعم

ثانيا والله زعلي لله ومش من افراد ولا من اشخاص

زعلي من مواقف بتاخذ علينا واحنا مش واخدين بالنا

اعلم جيدا نواياكم الطيبه ولا اشكك ولو للحظه فيها

واعلم انكم داخل النار وانا هنا في نعيم امريكا

واعلم انني لا استطيع غير الكلام

اعلم ما في صدوركم ومالا تخجلون ان تقولوه لي

وهذا من تربيتكم الاصيله

ولكن

خروجي من مصر يعرفه البعض القليل هنا

ولماذا هاجرت واتغربت ورحلت روحي قبل جسدي

فروحي هي مصر وجسدي هو من والي تراب مصر

وساعود ان شاء الله لاني بلاجزور هنا

اخوتي اخواتي

سئتم الظن بي

لم ارميكم بالخيانه

اقرؤ كلامي جيدا

قلت الموت للخونه

وتبتر يدي ان كنت اقصدكم انتم وتشل اطرافي ويصمت لساني لابد الابدين

اختلفنا بالراي وانا علي صواب وانا علي خطاء يعلم الله

اعتزر لكل من تهجمت عليه بالقول والله ما فعلت هذا الا حبا لكم وحبا بمصر

اللهم اهدنا صراط المستقيم سراط الذين انعمت عليهم غير المغضوب عليهم والضالين

امين

طبعا يا عمو منعم وجهه نظرك تحترم وبشده وزى ما قال رامى الاختلاف فى الرأى لا يفسد للود قضيه بس انا اللى صعبان عليا التخبط اللى احنا بقينا فيه وفكره عدم تقبل وجهه نظر الآخر وبسأل سؤال واحد وانا واثقه ان أجابته واحده وكلنا عارفينها
معارض او مؤيد اللى يهمك فى الاخر ايه مش بردو مصلحه وأمن بلدك؟

اكيد وبلا شك الاجابه نعم

لازم يا جماعه نوصل للنقطه دى ونستوعبها ونفهمها

وسواء بقى يرحل او يستمر الفتره اللى باقيه ليه انا اقسم بالله ما بقيت افكر فى حاجه دلوقتى ولا يهمنى حاجه غير بلدى اولا والناس اللى بتموت دى ثانيا وكل همى اصحى من النوم مش على صوت قنوات الاخبار بتتحدث عن مقتل كذا واصابه كذا بعد ما كنا بنسمع ده عن بلاد تانيه واقولها بكل صراحه انا كنت بتعاطف معاهم لكن انى اعيش الموقف ده شئ مختلف تماما
أنا مش مع مبارك وسواء رحل او استمر الفتره اللى باقيه مش معنى ده انى هنسى كل اللى عمله فينا وفى بلدى
لكن ........ مع أمن واستقرار وتغير بلدى للصورة اللى ترضينا جميعآ

انا مش ممكن اى قناه ولا فضائيه هتقدر تعملى غسيل مخ ولا هتغير اللى جوايا

لكن ....... انا نفسى افوق من الكابوس اللى احنا فيه ده بعد ما كان حلم جميل بعد ما جيه اليوم اللى شبابنا وولادنا قدرت تحقق كل اللى كنا بنحلم بيه ويدونا الامل فى بكره وبعد ما قدرنا نقول لا وباعلى صوت ولكن دلوقتى كل اللى قالقنى احنا رايحين على فين مصر لفين ؟؟؟؟؟؟؟؟؟

كل همى ان مصر تفضل مستقره وبخير وأمان وتعدى الايام الصعبه دى على خير

وأسفه على الاطاله

ربنا يهدى الحال

ودى ساحه من الرأى والرأى الاخر

وده حوار من اللى اتعلمناه لازم احترام للرأى الاخرين

والنقاش والجدال ده مطلوب وان شاء الله مافيش اى حاجه هتقدر تاثر على علاقنا ببعض

ده اكيد طبعا .. وربنا يستر على الجميع ويارب مصر تفضل امن وامان لولدها وشبابه

اللى هما وقفوا وتصدور للظروف اللى اتعرضنا ليه كلنا فى مصر

وياريت بس ليا طلب بلاش نقول انا منسحب ولا مش هرد ولا هقول رأى

ده هو الخطا يا جماعه فى ساحه من النقاش والحوار ياريت نفهمها اكتر من كده

يلا يارب يسترها على مصر

شكرا يا عمو منعم كلامك ليه معنى كبير واكيد بنقولك وجودك هيفرق معنا كتير

وياريت متغبش عننا ويارب تكون بخير

خلاص انا اتشتت من كتر التفكير

مش عارفه انا مع ولا ضد

بس انا مع التغيير

اقسم بربى استاذى العزيز بجد والله العظيم حضرتك كتبت

الموضوع اللى انا كنت هكتبه حالا وكل كلمة فى قلبى حضرتك قلتها

اشكرك من كل قلبى اغلى استاذ منعم بالوجود والله بجد الحكمة والعقل

هما السلاح الوحيد الفعال الان

انا بس عايزة اقول حاجة انتوا عايزين مبارك يمشى ماشى بس

انا اقدر اجزم بل اقسم ان انسحب الان فان الاخوان المسلمين

سيتولون الحكم وهم من ليس لهم صلة بالاسلام بل هم يد ايران فى مصر

اقسم بالله اصدقائى الاعزاءانى ذهلت اليوم مما رايت بعد صلاة الجمعة

وجدت احد افراد جماعة الاخوان فى قريتى وهى احدى قرى المنصورة

كما يعلم البعض يعطى لكل شخص من جماعته الف جنيه ليس عشرين ولا مائة

بل الف جنيه لكل شخص حتى يركب السيارة ويسافروا الى القاهرة لدخول

ميدان التحرير فارجوا التفسير لهذا الموقف من اصحاب العقول الحكيمة

وهل انتم حقا تريدون رئيسا من هذه الجماعة المحظورة

وطبعا لا اقصد شيوخنا الاعزاءالكرام المحترمين ولكنكم تعلمون ما اقصده

مرة تانية اشكرك استاذى الكريم

وما اريد قوله

"اعتصموا بحبل الله جميعا ولا تفرقوا "

تعيش مصر حرة مستقرة

والله ياستاذى العظيم عبد المنعم اتفق معاك مية فى الميه فى كل كلمة قولتها فى خوفك عى بلدك الغالية

وحفظها من اى مساس يهز شعبها وامنها بلدنا مصر الحبيةالمفروض اننا نوقف ايد واحدة لنوقف من يحاول

ان يخربها ويدمر ارضها وحضارتها العريقة ان نوقف يد واحدة لنقطع ايد من يحاول اخرابها

انا اويد الناس التى طالبت باستمرار رئيسنا محمد حسنى مبارك خلال فترة الحكم الباقية من ولا يته

هؤلاء الناس هما الا بيخافو عى بلدهم من التخريب وادمار لان ليس من مصلحة مصر ان يتنحى رئيسنا من الحكم

واذا تنحى رئيسنا فى هذا التوقيت بلدنا سوف تنهار وتصبح بلد فوضوية وليس بلد الامن والامان سيحتلوها ابلطجية والصوص

الذين يروجو المواطنين ويسرقوهم ويحاولو المساس بامن مصر ان المصريين كلهم يتمنون رجوع الامان والاستقرار

وليس الفوضى والتخريب انا اويدك يامبارك حتى نهاية ولالايتك خوفا على بلدى الغالية الحبيبة واتمنى من المعارضيين

اننا نفكر بعقولنا وليس بعواطفنا حفاظا على بلدنا فى هذة الفترة حتى نهاية ولالايو رئيسنا وبعد كدة نطالب بتغير الحكم

واتمنى من الله سبحانه وتعالى ان يهدى ابنائنا ويحمى بلدنا من اى انهيار او تخريب

تسلم استاذى على هذا التوبك الذى اتاح لنا التعبير عن اشياء بداخلنا

» إلى كل أعضاء المنتدى .. هذه تهنئتى بطريقتى ....
» سجل إعجابك بعضو من أعضاء المنتدى ؟؟؟...
» لكم أعضاء المنتدى مع خالص الاحترام..لمن منهجه كتاب الله وسنته
» دعوة لكل أعضاء المنتدى الدخول لعودة الحلبنتيشى لقسمه من جديد
» أعضاء المنتديات في الغربال..!!